A asociación Francisco Lorenzo Mariño desenvolve un ano máis os actos da Semana Cultural en homenaxe ao falecido párroco de Aguiño, don Francisco, para conmemorar o seu pasamento. Trátase da décimo oitava edición desta cita cultural onde non faltará a música, o teatro e a historia da parroquia.
A programación inaugúrase mañá. A primeira actividade deste ciclo cultural en homenaxe a Francisco Lorenzo Mariño comezará coa charla do historiador Daniel Bravo Cores, que impartirá a charla titulada: “Aguiño e a súa entrada na historia”. Desenvolverase no Conservatorio de Aguiño a partir das 20.30 horas. E pechará a xornada a orquestra Nova Sons, que interpretará varias pezas.
O sábado ás 17.00 horas desenvolverase a ofrenda floral e a lectura do manifesto no cemiterio de Porto do Son. A igrexa parroquial de Aguiño acollerá a misa na honra de Francisco Lorenzo ás 19.00 horas e pechará o día o espectáculo teatral “Adulterio decente”, da compañía Charamela de Melide. Terá lugar ás 20.00 horas no conservatorio aguiñense.
E o domingo concluirá esta nova edición da semana cultural Francisco Lorenzo Mariño co concerto de Brais das Hortas. Celebrarase no conservatorio de Aguiño a partir das 18.00 horas.
