O conselleiro de Economía, Emprego e Industria, Francisco Conde, participou en Rianxo nun networking con empresarios e comerciantes da zona do Barbanza dentro da rolda que está a manter por toda a xeografía galega tanto para escoitar propostas como para informar das axudas e servizos cos que conta a Administración autonómica para apoiar o seu traballo.
Así, no eido empresarial, ofrécense apoios no ámbito tanto do asesoramento como do financiamento e axudas específicas para emprender. En canto ao asesoramento, Conde destacou a actividade dos coworking que en dúas edicións permitiron o desenvolvemento de 303 proxectos a cargo de 382 emprendedores; ou o servizo da Unidade Galicia Emprende que asesorou a máis de 1000 proxectos.
En canto a financiamento, o conselleiro lembrou a nova liña de Instrumentos Financeiros Innovadores (IFIs) para apoiar proxectos relacionados coa Industria 4.0. Explicou que, ademais da convocatoria de Galicia Emprende, os emprendedores de concellos rurais contan con Galicia Rural Emprende, unha liña de axudas que está aberta ata o 26 de marzo con apoios de entre 20.000 e 70.000 euros dirixida a autónomos e pequenas e medianas empresas que teñan previsto desenvolver actividades non agrarias no rural.
